સિંગર સિદ્ધુ મુસેવાલાની હત્યા મામલે દિલ્હી પોલીસે મોટો ખુલાસો કર્યો છે. જે લોરેન્સ બિશ્નોઈની લાંબા સમયથી પૂછપરછ કરવામાં આવી રહી છે, હવે પોલીસે તેને આ કેસનો માસ્ટમાઈન્ડ ગણાવ્યો છે. એવી પણ માહિતી આપવામાં આવી છે કે આ હત્યાકાંડમાં અત્યારસુધીમાં પાંચ આરોપીઓની ઓળખ કરવામાં આવી છે અને આગળની તપાસ કરવામાં આવી રહી છે.
દિલ્હી પોલીસના સ્પેશિયલ સેલે જણાવ્યું કે, મુસેવાલાની હત્યાની તૈયારીઓ ઘણા સમય પહેલા જ કરવામાં આવી હતી અને રણનીતિના ભાગરૂપે આ ઘટનાને અંજામ આપવામાં આવ્યો હતો. લોરેન્સ બિશ્નોઈ તેમાં મુખ્ય આરોપી હોવાનું સામે આવ્યું છે તો બીજી તરફ સિધેશ હિરામલની પણ કેસમાં સક્રિય ભૂમિકા સામે આવી છે.
પ્રેસ કોન્ફરન્સ દરમિયાન દિલ્હી પોલીસની કાર્યવાહીની વિગતવાર માહિતી આપવામાં આવી છે. આ કેસને ઉકેલવા માટે દિલ્હી પોલીસે શરૂઆતથી જ મહત્વની ભૂમિકા ભજવી હોવાનું જાણવા મળ્યું છે. તેમણે મિઠુ ખેડામાંથી બે શૂટરોને પણ પકડ્યા હતા. તપાસ દરમિયાન વિકાસ મહાલેનું નામ સામે આવતાં દિલ્હી પોલીસે તેની પણ ધરપકડ કરી હતી.
મૂસેવાલા મર્ડર કેસમાં જે આરોપીઓના નામ સામે આવ્યા છે તેમાં એક આરોપી સિંગરની ખૂબ નજીક હોવાનું કહેવાય છે. દિલ્હી પોલીસના જણાવ્યા અનુસાર, તેઓ પહેલા સાથે શૂટિંગ કરતા હતા. આવી સ્થિતિમાં બંને એકબીજાને પહેલાથી જાણતા હતા. હાલ તો દિલ્હી પોલીસ માની રહી છે કે મહાકાલ ઉર્ફે સિધેશ હીરામલની ધરપકડથી આ કેસમાં ઘણી કડીઓ સ્પષ્ટ થઈ શકે છે. લોરેન્સ બિશ્નોઈ પણ પૂછપરછ દરમિયાન જે ખુલાસા કરી રહ્યો છે તેના આધારે કેસની તપાસ આગળ વધારી રહ્યા છે.
મહાકાલ વિશે એવી માહિતી પણ સામે આવી રહી છે કે તે મુસેવાલા હત્યાકાંડમાં સામેલ હત્યારાની ખૂબ નજીક છે. આ સમયે મહારાષ્ટ્ર પોલીસ દ્વારા મહાકાલની ધરપકડ કરવામાં આવી છે, તેની પૂછપરછ બે રાજ્યોની પોલીસ સાથે મળીને કરવા જઈ રહી છે. દિલ્હી પોલીસ પણ તેની પૂછપરછ કરશે અને મુંબઈ પોલીસ પણ તેના પુરાવાના આધારે સવાલ-જવાબ કરશે.
જો કે પ્રેસ કોન્ફરન્સ દરમિયાન સલમાન ખાનને મળેલા ધમકીભર્યા પત્રનો મુદ્દો પણ ઉઠ્યો હતો. તેવામાં દિલ્હી પોલીસે કંઇ પણ સ્પષ્ટ કહેવાનો ઇન્કાર કર્યો હતો, પરંતુ મુંબઇ પોલીસ આ મામલે તપાસ કરી રહી હોવાનું જણાવવામાં આવ્યું હતું.
