સુરતના મેયર હેમાલી બોઘાવાલાનો મોંઘાદાટ બંગલો ફરી વિવાદમાં આવ્યો છે. પ્રજાના પૈસાનો મેયરના ઘરની પાછળ ખર્ચ થયા હોવાના આક્ષેપો લાગી રહ્યા છે. 5 કરોડના ખર્ચે તૈયાર થયેલા ઘરનું મેઈન્ટનેન્સ મોંઘુ સાબિત થઈ રહ્યું છે. આ વચ્ચે વધુ એક સમાચારે ચર્ચા જગાવી છે.
હવે નવા વાસણ લાવવા માટે અઢી લાખ રૂપિયાનો ખર્ચ કરવામાં આવ્યો હોવાનું સામે આવ્યું છે. મેયર હેમાલી બોઘાવાલાએ કરેલા આડેધડ ખર્ચને લઈ વિપક્ષના નેતાએ સવાલ ઉઠાવ્યા છે. તેમણે જણાવ્યું કે, નિયમના વિરૂદ્ધમાં મેયરના બંગ્લા પાછળ લાખોના ખર્ચાને મંજૂરી આપવામાં આવી રહી છે. જો નવી વસ્તુ ખરીદીએ તો તેને એસેટમાં ગણી શકાય, પરંતુ મેઈન્ટનેન્સના નામે લાખો રૂપિયાના બિલને મંજૂરી આપવામાં આવી રહી છે.
પ્રજાના પૈસાનો દુરૂપયોગ!
- વીજ બીલનો ખર્ચ 51 હજાર
- છોડની પાછળ 2.75 લાખનો ખર્ચો
- 1.46 લાખ AC ડ્રેઈન વોટર પાછળ ખર્ચ
- 2.5 લાખના નવા વાસણ
- 80 હજારના કુંડા નંખાયા
આમ આદમી પાર્ટીએ આક્ષેપ કર્યા છે કે, ટેન્ડરિંગ કર્યા વિના ખરીદી કરવામાં આવી હતી. તેમજ મેન્ટેનસમાં ખર્ચો પાડી દેવાયો હોવાનો ‘આપ’નો આક્ષેપ છે. વાસણોની ખરીદી મેન્ટેનન્સના કોટા હેઠળ થઇ હોવાનો આક્ષેપ પણ વિરોધ પક્ષે કર્યો છે. તેમણે કહ્યું કે, ભાજપના શાસકો મનફાવે તે રીતે પ્રજાના પૈસે સુવિધાઓ ઊભી કરે છે.
