Shabaash Mithu Trailer: આ દિવસોમાં બોલિવૂડમાં સ્પોર્ટ્સ બાયોપિક પર ફિલ્મ બનાવવાનો ટ્રેન્ડ છે. લાંબા સમયથી કેટલીક ફિલ્મો મોટા પડદા પર આવી રહી છે અને લોકોને ક્રિકેટના જાદુથી વાકેફ કરી રહી છે. ગયા વર્ષે રિલીઝ થયેલી ’83’એ લોકોને 1983ના વર્લ્ડ કપના જાદુથી વાકેફ કર્યા હતા અને હવે ભારતીય મહિલા ક્રિકેટના કેપ્ટનની કહાની જણાવવા માટે આવી રહી છે ફિલ્મ ‘શાબાશ મીટ્ઠૂં'(Shabaash Mithu).
તાપસી બની મિતાલી
તાપસી પન્નુને બોલિવૂડની શ્રેષ્ઠ અભિનેત્રીઓમાંની એક ગણવામાં આવે છે. તેની ફિલ્મોમાં સારી કહાનીની ગેરંટી આપવામાં આવે છે. ટૂંક સમયમાં તાપસી ભારતીય ક્રિકેટ ટીમના પૂર્વ કેપ્ટન મિતાલી રાજની ભૂમિકા ભજવતી જોવા મળશે. અભિનેત્રીની ફિલ્મ ‘Shabaash Mithu’નું ટ્રેલર સામે આવ્યું છે, જેમાં મિતાલી રાજ અને ભારતીય મહિલા ક્રિકેટની મુશ્કેલીઓને ઉજાગર કરવામાં આવી છે. ટ્રેલરમાં દેખાડવામાં આવ્યું છે કે કેવી રીતે મિતાલી રાજ અને તેમની ટીમને પોતાની ઓળખ મેળવવા માટે સંઘર્ષ કરવો પડે છે.
ફિલ્મમાં 8 વર્ષની બાળકીથી લઈને દિગ્ગજ ક્રિકેટર બનવા સુધીની સફરને દેખાડવામાં આવી છે. ફિલ્મના ટ્રેલરમાં દેખાડવામાં આવ્યું છે કે, મિતાલી રાજ બાળપણમાં ક્રિકેટ રમવામાં માહેર છે અને કોચ તેમના માતા-પિતાને કહે છે કે જો તેને યોગ્ય રીતે તાલીમ આપવામાં આવે તો તે નેશનલ રમી શકે છે. આ પછી તેમની તાલીમ અને સંઘર્ષ શરૂ થાય છે. તાપસી પન્નુની આ ફિલ્મ 15 જુલાઈએ રિલીઝ થશે. આ ફિલ્મ સિનેમાઘરોમાં રિલીઝ થશે. આ ફિલ્મનું નિર્દેશન શ્રીજીત મુખર્જી કરી રહ્યા છે.
તમને જણાવી દઈએ કે, મિતાલી રાજ ભારતના સૌથી સફળ મહિલા બેટ્સમેન છે. તેમણે ભારત માટે 12 ટેસ્ટ મેચમાં 43.68ની એવરેજથી 699 રન બનાવ્યા છે. મિતાલી રાજે ટીમ ઈન્ડિયા માટે 232 ODI મેચ રમી હતી, જેમાં તેમના બેટથી 7805 રન બનાવ્યા હતા. મિતાલી રાજના નામે ODIમાં 64 અર્ધસદી અને 7 સદી છે, જે દરમિયાન તેમની એવરેજ 50.68 હતી. મિતાલી રાજે 89 ટી20 મેચ પણ રમી જેમાં તેમણે 37.52ની એવરેજથી 2364 રન બનાવ્યા.
મિતાલી રાજના નામે છે આ રેકોર્ડ
મિતાલી રાજના નામે વનડેમાં સૌથી વધારે રન બનાવવાનો રેકોર્ડ છે. મિતાલી રાજ ભારતના માટે લાંબા સમય સુધી કેપ્ટનશીપ કરનાર કેપ્ટન પણ છે. મિતાલી રાજે 155 વનડેમાં ટીમ ઈન્ડિયાની કમાન સંભાળી હતી, જેમાંથી ટીમે 89 મેચ જીતી હતી અને 63 મેચોમાં હારનો સામનો કરવો પડ્યો હતો. તેમણે 8 ટેસ્ટ મેચ અને 32 ટી20 મેચમાં કેપ્ટનશીપ પણ કરી હતી.
