રશિયાના રાષ્ટ્રપતિ વ્લાદિમીર પુતિન યુક્રેન પર તેમના આક્રમણમાં મદદ માટે ઉત્તર કોરિયાના સરમુખત્યાર કિમ જોંગ ઉન તરફ વળવાનું વિચારી રહ્યા છે. રશિયાના અહેવાલો અનુસાર પુતિન 100,000 સૈનિકોના બદલામાં કિમ જોંગને ઊર્જા અને અનાજ આપવા તૈયાર છે.
સૈનિકો મોકલવા તૈયાર છે ઉત્તર કોરિયા
એક સમાચાર એજન્સીના જણાવ્યા અનુસાર ઉત્તર કોરિયાએ ‘રાજનૈતિક ચેનલો’ દ્વારા સ્પષ્ટ કર્યું છે કે તે યુદ્ધમાં રશિયાની મદદ કરવા તૈયાર છે. ઉત્તર કોરિયાએ કહ્યું છે કે અમે મોસ્કોના પક્ષમાં યુક્રેનમાં વિશાળ લડાયક દળ મોકલવા માટે તૈયાર છીએ. તેમને ડોનેત્સ્ક પીપલ્સ રિપબ્લિક (DPR) અને લુહાન્સ્ક પીપલ્સ રિપબ્લિક (LRP) ના દળોમાં તૈનાત કરવામાં આવશે. બંનેને તાજેતરમાં કિમ જોંગે સ્વતંત્ર દેશો તરીકે માન્યતા આપી છે.
ક્રેમલિન તરફી સમાચાર એજન્સીના એક અહેવાલમાં જણાવવામાં આવ્યું છે કે ઉત્તર કોરિયા તેના 100,000 સૈનિકોને ડોનબાસમાં ખસેડવા માટે તૈયાર છે. તેના બદલામાં, કિમની ખોરવાયેલી અર્થવ્યવસ્થાને અનાજ અને ઊર્જા પૂરી પાડવામાં આવશે. મોસ્કોના એક અગ્રણી સંરક્ષણ નિષ્ણાત રિઝર્વ કર્નલ ઇગોર કોરોટચેન્કોએ જણાવ્યું હતું કે અમારે કિમ જોંગ ઉન દ્વારા અમારી તરફ લંબાવવામાં આવેલ હાથને સ્વીકારવામાં અચકાવું જોઈએ નહીં.
રોસિયા 1 ચેનલ પર રશિયાના રાષ્ટ્રીય સંરક્ષણ સામયિકના મુખ્ય સંપાદક કોરોટચેન્કોએ જણાવ્યું હતું કે એવા અહેવાલો છે કે ઉત્તર કોરિયાના 100,000 સ્વયંસેવકો યુદ્ધમાં ભાગ લેવા માટે તૈયાર છે. તેમણે કહ્યું કે ઉત્તર કોરિયાના લોકો સ્થિતિસ્થાપક છે અને સૌથી મહત્ત્વપૂર્ણ વાત એ છે કે તેઓ પ્રેરિત છે. તેમણે કહ્યું કે કિમ જોંગ ઉન દ્વારા અમને આપવામાં આવેલા હાથને સ્વીકારવામાં અમારે શરમ ન કરવી જોઈએ.
તમને જણાવી દઈએ કે રશિયા અને યુક્રેન વચ્ચેના યુદ્ધને 6 મહિનાથી વધુ સમય થઈ ગયો છે. 24 ફેબ્રુઆરીએ રશિયાના હુમલા સાથે યુક્રેનમાં યુદ્ધ શરૂ થયું હતું. રશિયા યુદ્ધ જીતવા માટે સખત સંઘર્ષ કરી રહ્યું છે, આ કારણોસર હવે રશિયા ઉત્તર કોરિયાની મદદ લેવાનું વિચારી રહ્યું છે.
