રાજ્યમાં છેલ્લા 2-3 દિવસથી ગરમીમાં ઘટાડો નોંધાયો છે. બીજી બાજુ રાજ્યમાં પ્રિ-મોન્સૂન એક્ટિવિટી શરૂ થઈ રહી છે. હવામાન વિભાગની આગાહી પ્રમાણે, 25 મેથી દક્ષિણ ગુજરાતમાં વરસાદની સંભાવના છે.
હવામાન વિભાગના જણાવ્યા પ્રમાણે, દક્ષિણ ગુજરાતના નવસારી અને વલસાડ જિલ્લામા હળવો વરસાદ પડવાની આગાહી છે. જ્યારે કેન્દ્ર શાસિત પ્રદેશ દમણ અને દાદરા નગરહવેલીમાં પણ સામાન્ય વરસાદ થઈ શકે છે.
બીજી બાજુ રાજ્યમાં હજી આગામી 4-5 દિવસ ગરમીમાં રાહત મળશે અને તાપમાનમાં 2-3 ડિગ્રી સુધી ઘટવાનો અંદાજ છે. અમદાવાદમાં આ દરમિયાન તાપમાનનો પારો 40 ડિગ્રી આસપાસ રહેવાનો અંદાજ છે.
આ વખતે રાજ્યમાં ચોમાસું સામાન્ય રહે એમ મનાઈ રહ્યું છે. હવામાન અંગે આગાહી કરતી ખાનગી સંસ્થા સ્કાયમેટ પ્રમાણે, કેરળમાં 26 મેથી ચોમાસાનું આગમન થઈ શકે છે. આ સ્થિતિમાં દક્ષિણ ગુજરાતમાં 10થી 15 જૂન વચ્ચે અને 15થી 20 જૂન વચ્ચે રાજ્યના મોટા ભાગના વિસ્તારોમાં ચોમાસાનું આગમન થઈ શકે છે.
