આણંદ જિલ્લાના ઉમરેઠ તાલુકામાં એ સમયે લોકોમાં ભારે કુતૂહલ અને ભય ફેલાયો જ્યારે અચાનક અવકાશમાંથી અલગ અલગ ત્રણ જગ્યાઓએ ભારેખમ ગોળા જેવી વસ્તુઓ પડી.
આણંદ જિલ્લાના ઉમરેઠ અને ભાલેજ પોલીસ સ્ટેશન તાબેના ત્રણ અલગ અલગ ગ્રામ્ય વિસ્તાોરમાં અવકાશમાંથી અજાણી ભારેખમ ગોળા જેવી વસ્તુઓ પડતા લોકોમાં એકબાજુ જ્યાં કુતૂહલ સર્જાયું હતું તો બીજીબાજુ ભય પણ જોવા મળ્યો હતો. આ ઘટનાના પગલે આસપાસના વિસ્તારમાં ભયનું વાતાવરણ સર્જાયું છે.
આ વસ્તુઓ જોવા લોકોના ટોળેટોળા પણ ઉમટી પડ્યા હતા. જોકે કોઈ જાનહાનિના સમાચાર નથી. પોલીસ ટીમે ઘટના સ્થળે પહોંચી આ અવકાશી વસ્તુ અંગે તપાસ હાથ ધરી છે.
પોલીસના જણાવ્યા મુજબ અવકાશમાંથી પૃથ્વી ઉપર પડેલા આ પદાર્થ સેટેલાઈટમાંથી છૂટા પડેલા કોઈ ઉપકરણ હોવાનું પ્રતિત થઈ રહ્યુ છે. આ અંગેની ચકાસણી માટે સંબંધિત વિભાગ અને એજન્સીઓને જાણ કરવામાં આવી છે.
