ઈન્ડિયન ઈન્સ્ટિટ્યૂટ ઑફ મેનેજમેન્ટમાં પ્રવેશ માટેની તૈયારી કરી રહેલા ઉમેદવારો માટે ખૂબ જ મહત્વપૂર્ણ સમાચાર સામે આવી રહ્યા છે. IIM અમદાવાદે MBA એડમિશન 2022 માટે પાત્રતાના માપદંડમાં ફેરફાર કર્યો છે. નવા નિયમ પ્રમાણે હવે અહીં MBA કોર્સમાં એડમિશન માટે ગ્રેજ્યુએશન માર્કસ ગણવામાં આવશે નહીં.
એટલે કે, પ્રવેશ માટે તમારા ગ્રેજ્યુએશન માર્કસનું કોઈ ભારણ હશે નહીં. IIM એડમિશન 2022ના આધારે સ્નાતકની ડિગ્રીમાં મેળવેલા ગુણને બાકાત રાખવામાં આવ્યા છે. જોકે, કોમન એડમિશન ટેસ્ટ એટલે કે CAT એક્ઝામ આ માટે લેવાનારી પ્રવેશ પરીક્ષાનું વેઈટેજ પહેલા જેવું જ રહેશે.
જાણો શું છે નવો નિયમ?
IIM અમદાવાદ MBA પ્રવેશ માટે ઉમેદવારોના શૈક્ષણિક રેટિંગની ગણતરી કરે છે. તેને ટૂંકા સ્વરૂપમાં AR સ્કોર પણ કહેવામાં આવે છે. આ સ્કોરની ગણતરી કરવા માટે, અગાઉ વિદ્યાર્થીઓના CAT સ્કોર અને સ્નાતકની ડિગ્રીમાં મેળવેલા ગુણની ગણતરી કરવામાં આવતી હતી. પરંતુ હવે તેમાં બેચલરના માર્ક્સ ઉમેરવામાં આવશે નહીં.
શા માટે પ્રવેશ માપદંડ બદલાયા
IIM અમદાવાદનું કહેવું છે કે, કોરોનાને કારણે ઘણી યુનિવર્સિટીઓએ છેલ્લા બે વર્ષમાં પરીક્ષાઓ લીધી નથી. સંસ્થાઓએ વૈકલ્પિક માપદંડોના આધારે વિદ્યાર્થીઓને પ્રોત્સાહન આપ્યું છે. આ ઉપરાંત, CAT 2021 સમિતિએ પરીક્ષામાં બેસવા માટે લઘુત્તમ ગ્રેજ્યુએશન માર્ક્સની જરૂરિયાતને પણ નાબૂદ કરી દીધી હતી. આ તમામ પરિબળોને ધ્યાનમાં રાખીને, શોર્ટલિસ્ટિંગ માપદંડમાંથી સ્નાતકની ડિગ્રીના માર્ક્સ દૂર કરવાનો નિર્ણય લેવામાં આવ્યો છે. તે તમામ ઉમેદવારો પર સમાન રીતે લાગુ કરવામાં આવશે.
