Bank Strike Dec 2021: બેંકોના પ્રસ્તાવિત ખાનગીકરણના વિરોધમાં શુક્રવારે સતત બીજા દિવસે બેંકકર્મીઓની હડતાળ ચાલુ છે. દેશભરની તમામ સરકારી બેંકો (PSBs)ના નવ લાખથી વધુ કર્મચારીઓ આ હડતાળમાં જોડાયા છે. જેના કારણે બેંકિંગ સેવાઓ પર અસર પડી રહી છે અને સામાન્ય લોકોને મુશ્કેલીનો સામનો કરવો પડી રહ્યો છે. પહેલા દિવસની હડતાળને કારણે લગભગ 19 હજાર કરોડનું બેંકિંગ કામકાજ પ્રભાવિત થવાનો અંદાજ છે.
સરકારી બેંકોની આ સેવાઓ પર થઈ રહી છે અસર
ઓલ ઈન્ડિયા બેંક એમ્પ્લોઈઝ એસોસિએશન (AIBEA)ના જનરલ સેક્રેટરી સીએચ વેંકટચલમે દાવો કર્યો છે કે, પ્રથમ દિવસની હડતાળને કારણે 20.4 લાખ ચેકનું ક્લિયરન્સ અટકી ગયું. તેના કારણે લગભગ 19000 કરોડ રૂપિયાના બેંકિંગ કામકાજને અસર થઈ. સરકારી બેંક કર્મચારીઓની આ હડતાળને કારણે ગુરુવારે ડિપોઝીટ, ઉપાડ, ચેક ક્લિયરન્સ, લોન એપ્રુવલ જેવી કામગીરીને અસર થઈ.
પ્રાઈવેટ બેંકોમાં કામકાજ ચાલુ
બેંક કર્મચારીઓના નવ યુનિયનોએ સાથે મળીને આ હડતાળનું એલાન કર્યું છે. આમાં તમામ સરકારી બેંકોના કર્મચારીઓ ભાગ લઈ રહ્યા છે. SBI, PNB જેવી બેંકોના ગ્રાહકોને બેંકિંગ કામગીરીમાં સમસ્યાનો સામનો કરવો પડી રહ્યો છે. બીજી તરફ એચડીએફસી બેંક, આઈસીઆઈસીઆઈ બેંક સહિત તમામ ખાનગી બેંકોમાં સામાન્ય કામગીરી ચાલી રહી છે.
આ સેવાઓ પર કોઈ અસર નહીં
તમામ બેંકોની ડિજિટલ બેંકિંગ સેવાઓ (ડિજિટલ બેંકિંગ), ઈન્ટરનેટ બેંકિંગ, UPI આધારિત સેવાઓ (UPI), મોબાઈલ બેંકિંગ વગેરે સામાન્ય રીતે કામ કરી રહી છે. બેંકોએ હડતાળને ધ્યાનમાં રાખીને પહેલેથી આ વ્યવસ્થા કરવાનું શરૂ કરી દીધું હતું જેથી ગ્રાહકોને અઠવાડિયા દરમિયાન ATMમાંથી પૈસા ઉપાડવામાં કોઈ મુશ્કેલી ન પડે. ATMમાંથી રોકડ ખતમ થવાના કિસ્સાઓ અત્યાર સુધી સામે આવ્યા નથી.
