- વાત સરકારની

અમદાવાદઃ ઉંમરના નવ દાયકા પૂર્ણ કરી ચુકેલા નાગરિકોનું CM રુપાણીએ કર્યું સન્માન

તા-10-02-2020 અમદાવાદમાં વયવંદના સમારોહમાં ઉદબોધન કરતાં મુખ્યમંત્રીએ જણાવ્યું કે, વડીલો યુવા પેઢી માટે દીવાદાંડી સમાન છે. વડીલો ઉંમરનો તકાજો અને અનુભવનો ખજાનો ધરાવે છે. જ્યાં મોભીઓ બેઠા હોય ત્યાં સમાજમાં સંસ્કાર, લાગણી અને ભાવનાનું સિંચન થતું રહે છે.

મુખ્યમંત્રીએ કહ્યું કે, આપણે વ્યક્તિથી સમષ્ટિના કલ્યાણનો વિચાર કરનારા છીએ. કુટુંબ વ્યવસ્થામાં વડીલ સર્વોપરી હોય છે. વડીલો માટે આદરનો ભાવ આપણે સૌ કોઈમાં સહજ છે. ધર્મ, અર્થ, કામ, મોક્ષ અને ચાર વર્ણાશ્રમનો ઉલ્લેખ કરીને મુખ્યમંત્રીએ કહ્યું કે, સંન્યાસ આશ્રમ એ માત્ર ભૌતિક ત્યાગ નહીં પરંતુ મનથી – વિચારોથી ત્યાગની વિભાવના શીખવે છે. સંન્યાસ આશ્રમમાં રાગ-દ્વેષ સહિતના વિકારોનો ત્યાગ પણ નિહિત છે. અહમ-મમત્વના ભાવથી ઉપર ઉઠીને સમ્યકભાવ કેળવી મોહ-માયા છોડવી એ જ સાચો સંન્યસ્તાશ્રમ છે એમ ભારતીય વૈદિક પરંપરા શીખવે છે.

મુખ્યમંત્રીએ જણાવ્યું કે, વૃદ્ધાવસ્થા એટલે પ્રવૃત્તિથી નિવૃત્તિ તરફ જવાનો કાળ છે સાથે જ મનોવૃત્તિને પણ તમામ માર્ગોમાંથી પાછી વાળી નિવૃત્તિનો આનંદ માણવાનો સમય છે. ગુજરાતમાં વડીલો બેઠા છે એ ગુજરાતનું ગૌરવ છે અને એટલે જ ગુજરાતનો યુવાવર્ગ વડીલોના પીઠ બળે સ્વઉત્કર્ષના માર્ગે છલાંગ લગાવતા જાય છે. ગુજરાતની સરકાર સંવેદનશીલ સરકાર છે, રાજ્ય સરકારને વૃદ્ધ -વડીલોની સંપૂર્ણ દરકાર છે. વિવિધ સંસ્થાઓ તરફથી આવતી માગણીઓને હર-હંમેશ પૂરી કરવા માટે સરકાર તત્પર રહી છે.

મુખ્યમંત્રીએ શહેરના વરિષ્ઠ નાગરિકોને સન્માનપત્ર એનાયત કર્યા હતા સાથે જ વયવંદના સમિતિ દ્વારા પ્રિવિલેજ કાર્ડ પણ અર્પણ કર્યા હતા. આ પ્રસંગે મેયર બિજલબેન પટેલ, વયવંદના સમિતિના મહામંત્રી કે.બી.બારોટ, શહેર લાફ્ટર ક્લબના અધ્યક્ષ મુકુંદ મહેતા અને વરિષ્ઠ નાગરિકો મોટી સંખ્યામાં ઉપસ્થિત રહ્યા હતા.

0Shares