23-08-2021 મુખ્યમંત્રી વિજયભાઇ રૂપાણી અને નાયબ મુખ્યમંત્રી નીતિનભાઇ પટેલના માર્ગદર્શનમાં ગુજરાતે કોરોના વેક્સિન ઝૂંબેશ વેગવંતી બનાવી અત્યાર સુધીમાં 4 કરોડ 31 લાખ 68 હજાર 497 વેક્સિનના ડોઝ આપવાની સિદ્ધિ મેળવી છે.
મુખ્યમંત્રી વિજયભાઇ રૂપાણીએ રાજ્યમાં કોરોના વેક્સિનેશન અભિયાનને વધું વ્યાપક બનાવી ઓગસ્ટ મહિના દરમિયાન સમગ્ર રાજ્યમાં વેક્સિનના 1 કરોડ ડોઝ અપવાનો લક્ષ્યાંક રાખ્યો હતો.
રાજ્યના આરોગ્ય કર્મીઓ, તબીબો, પેરા મેડિકલ સ્ટાફ સહિત સૌએ ઓગસ્ટ મહિના દરમિયાન આ રસીકરણ અભિયાનને ઝુંબેશ સ્વરૂપે ઉપાડીને માત્ર ત્રેવીસ દિવસમાં એટલે કે સોમવાર તા. 23 ઓગસ્ટ સુધીમાં 1 કરોડ 18 હજાર 118 ડોઝ આપવાનો લક્ષ્યાંક પાર કરી દીધો છે. મુખ્યમંત્રીએ રાજ્યના સૌ આરોગ્ય કર્મીઓને આ સઘન કામગીરી માટે અભિનંદન પાઠવ્યા છે.
ગુજરાતમાં 18 વર્ષથી ઉપરની વયના રસીકરણ માટે પાત્રતા ધરાવતા કુલ 4 કરોડ 93 લાખ 20 હજાર 903 લોકોમાંથી અત્યાર સુધીમાં 3 કરોડ 25 લાખ 84 હજાર 198ને પ્રથમ ડોઝ અને 1 કરોડ 05 લાખ 84 હજાર 299ને બીજો ડોઝ મળી સમગ્રતયા 4,31,68,497 ડોઝ વેક્સિનેશનના આપવામાં આવ્યા છે.
ગુજરાત પર મિલિયન વેક્સિનેશનમાં દેશના મોટા રાજ્યોમાં અગ્રેસર રાજ્ય રહ્યું છે. એટલુ જ નહીં, સોમવાર તારીખ 23 ઓગસ્ટના એક જ દિવસમાં રાજ્યમાં 5 લાખ 1 હજાર 845 રસીના ડોઝ આપવાની સિદ્ધિ પણ ગુજરાતે મેળવી છે.
