પશ્ચિમ દિલ્હીમાં મુંડકા મેટ્રો સ્ટેશન પાસે શુક્રવારે એક બિલ્ડિંગમાં આગ લાગતાં ઓછામાં ઓછા 27 લોકોનાં મૃત્યુ થયાં હતાં. જ્યારે અનેક ઈજાગ્રસ્ત થયા હતા. ઈજાગ્રસ્તોને નજીકની હોસ્પિટલમાં સારવાર અર્થે ખસેડાયા છે. ફાયર બ્રિગેડના અધિકારીઓએ જણાવ્યું હતું કે સંખ્યા વધી શકે છે કારણ કે વધુ લોકો ફસાયા હોવાની આશંકા છે અને બચાવ કામગીરી ચાલુ છે. રાષ્ટ્રપતિ રામનાથ કોવિંદે આગની આ ઘટના પર શોક વ્યક્ત કર્યો છે. આ તમામ ઈજાગ્રસ્તોની સંજય ગાંધી હોસ્પિટલમાં સારવાર ચાલી રહી હતી. આગ પર કાબૂ મેળવવા માટે 24 ફાયર ટેન્ડર ઘટનાસ્થળે હાજર છે. દિલ્હી ફાયર સર્વિસના અધિકારીઓએ જણાવ્યું હતું કે આગ વિશેનો કોલ સાંજે 4:40 વાગ્યે આવ્યો હતો. ડીએફએસના વડા અતુલ ગર્ગે જણાવ્યું હતું કે આગ સૌપ્રથમ મેટ્રો સ્ટેશનના પિલર 544 પાસે લાગી હતી. શરૂઆતમાં 10 ફાયર ટેન્ડર ઘટનાસ્થળે મોકલવામાં આવ્યા હતા. બાદમાં આગ ઓલવવા માટે અન્ય 14ને મોકલવામાં આવ્યા હતા. દિલ્હી પોલીસે જણાવ્યું હતું કે પ્રાથમિક તપાસમાં જાણવા મળ્યું છે કે અસરગ્રસ્ત બિલ્ડીંગનો ઉપયોગ સામાન્ય રીતે કોમર્શિયલ હેતુઓ માટે થતો હતો, જેમ કે કંપનીઓ માટે ઓફિસની જગ્યા પૂરી પાડવા માટે. આગ બિલ્ડીંગના પહેલા માળેથી શરૂ થઈ હતી, જેમાં સીસીટીવી કેમેરા અને રાઉટર બનાવતી કંપનીની ઓફિસ છે. એક પોલીસ અધિકારીએ જણાવ્યું હતું. પોલીસે જણાવ્યું કે પેઢીના માલિકને કસ્ટડીમાં લેવામાં આવ્યો છે.
આગની તીવ્રતા જોતા ફાયર વિભાગે ડ્રોન કેમેરાની મદદથી આગને કાબુમાં લીધી હતી. ડ્રોનથી મળેલી તસવીરો અને વીડિયોના આધારે ફાયર બ્રિગેડે આગના સ્થળોને નિશાન બનાવ્યા હતા. આ પછી રાત્રે 8 વાગ્યાની આસપાસ આગને કાબૂમાં લેવામાં આવી હતી પરંતુ આગ ઓલવાઈ ન હતી. ફાયર બ્રિગેડના અધિકારીએ જણાવ્યું કે આગ ઓલવ્યા બાદ તે ઠંડી પડે તેની રાહ જોવામાં આવશે. આ સાથે ઠંડકની પ્રક્રિયા શરૂ કરવામાં આવશે. ત્યારબાદ બચાવ કાર્ય શરૂ કરવામાં આવશે. તપાસ દરમિયાન જાણવા મળ્યું કે આખી ઇમારતને નો-ઓબ્જેક્શન સર્ટિફિકેટ મળ્યું નથી. પોલીસ સમગ્ર મામલાની તપાસ કરી રહી છે. તેણે ઓફિસના માલિકને કસ્ટડીમાં લીધો છે. આ સાથે જ બિલ્ડિંગના માલિક મનીષ લાકરાની પણ પૂછપરછ કરવામાં આવશે. પોલીસ અધિકારીએ કહ્યું કે તપાસના આધારે એફઆઈઆર નોંધવામાં આવશે.
અકસ્માત મુખ્ય માર્ગ પર થયો હોવાથી. ચાલી રહેલા બચાવ અભિયાનને કારણે સમગ્ર વિસ્તાર બ્લોક થઈ ગયો હતો. ટ્રાફિક પોલીસ જામ હટાવવામાં વ્યસ્ત થઈ ગઈ હતી. દરમિયાન, બિલ્ડીંગમાંથી બહાર આવેલા ઇજાગ્રસ્તોને હોસ્પિટલ લઇ જવા માટે ટ્રાફિક પોલીસે ગ્રીન કોરીડોર બનાવ્યો હતો. મુંડકાથી સંજય ગાંધી હોસ્પિટલ સુધી આ કોરિડોર બનાવવામાં આવ્યો હતો.જેના કારણે એમ્બ્યુલન્સ કોઈપણ ટ્રાફિક જામ વિના ઘાયલોને હોસ્પિટલ સુધી પહોંચાડી શકતી હતી. હાલ મોડી રાત સુધી ટ્રાફિક પોલીસ ટ્રાફિક વ્યવસ્થા જાળવવામાં વ્યસ્ત હતી.
