59 ગ્રાન્ટેડ બીએડ કોલેજમાં પ્રવેશ માટે તૈયારી કરતા વિદ્યાર્થીઓ માટે મહત્વના સમાચાર સામે આવ્યા છે. રાજ્ય ટીચર્સ યુનિવર્સિટી સાથે જોડાયેલી 59 ગ્રાન્ટેડ બીએડ કોલેજમાં પ્રવેશ માટે 29મી મેના રોજ પ્રવેશ પરીક્ષા લેવામાં આવશે.
પ્રવેશ ઈચ્છતાં વિદ્યાર્થીઓ આગામી 15 મે સુધીમાં ઓનલાઈન એપ્લિકેશન કરી શકશે. 4 જૂનના રોજ પરિણામ જાહેર કરીને પ્રવેશ કાર્યવાહી શરૂ કરવામાં આવશે.
મળતી માહિતી મુજબ, રાજ્યની જુદી જુદી યુનિવર્સિટીઓ સાથે જોડાયેલી ગ્રાન્ટેડ કોલેજોના ટીચર્સ યુનિવર્સિટી સાથે જોડ્યા બાદ હવે પ્રવેશ પરીક્ષાના આધારે પ્રવેશ આપવામાં આવી રહ્યો છે. આગામી વર્ષ માટે પ્રવેશ પ્રક્રિયાની જાહેરાત કરી દેવામાં આવી છે. સૂત્રોના જણાવ્યા મુજબ ગુજરાત ટીચર્સ યુનિવર્સિટી સંલગ્ન 59 જેટલી બીએડની ગ્રાન્ટેડ કોલેજોમાં પ્રવેશ માટે પ્રવેશ પરીક્ષા આગામી તા. 29મી મેના રોજ યોજાશે.
આ પ્રવેશ પરીક્ષા ગ્રાન્ટેડ બી.એડ કોલેજની 2950 બેઠકો ઉપરાંત આઇઆઇટીઇમાં ચાલતાં ઇન્ટિગ્રેટેડ અભ્યાસક્રમો બી.એસસી-બી.એડ, બી.એ.બી.એડની 100-100 બેઠકો અને ઇનોવેટિવ કોર્સ એમએસસી-એમ.એ.-એમ.એડની 100 બેઠકો ઉપરાંત બી.એડ-એમ.એડની 50 બેઠકો અને એમ.એડ ગુજરાતી માધ્યમ અને એમએડ અંગ્રેજી માધ્યમની 50-50 બેઠકો માટે પણ આ પ્રવેશ પરીક્ષાના આધારે પ્રવેશ ફાળવવામાં આવશે.
બી.એડ કોલેજોની યાદી પણ વેબસાઇટ પર મુકવામાં આવી હોવાથી વિદ્યાર્થીઓ કઇ કઇ કોલેજમાં પ્રવેશ માટે આ પરીક્ષા આપવી પડશે તેની જાણકારી મેળવી શકશે. 4થી જૂનના રોજ પ્રવેશ પરીક્ષાનું પરિણામ જાહેર કર્યા બાદ 1લી જુલાઇથી દરેક બી.એડ કોલેજમાં અભ્યાસક્રમ શરૂ કરવામાં આવશે.
