કોંગ્રેસ અધ્યક્ષ રાહુલ ગાંધી અને તેમના બહેન પ્રિયંકા ગાંધી વાડ્રાનો એક વીડિયો વાયરલ થઈ રહ્યો છે. આ વીડિયોમાં બંન્ને વચ્ચે પોતાના હેલિકૉપ્ટરને લઈ વાતચીત થઈ રહી છે. વીડિયોમાં રાહુલ અને પ્રિયંકા વચ્ચે સારુ બૉન્ડિંગ દેખાયું. કહેવામાં આવી રહ્યું છે કે આ વીડિયો કાનપુર એરપોર્ટનો છે.
ઉત્તર પ્રદેશમાં ચૂંટણી પ્રચાર માટે રવાના થવા માટે રાહુલ અને પ્રિયંકા ગાંધી કાનપુર એરપોર્ટ પર પહોંચ્યા. અહીંથી રાહુલ ગાંધી રાયબરેલી માટે તો પ્રિયંકા ઉન્નાવ માટે રવાના થયા. આ પહેલા બંન્નેએ પોતાના હેલિકૉપ્ટર માટે વાત કરી. વીડિયોમાં રાહુલ ગાંધી કહે છે કે પ્રિયંકા ઓછા અંતરનું સફર કરે છે, તો પણ તેમને મોટું હેલિકૉપ્ટર મળ્યું છે.
મજાકીયા અંદાજમાં રાહુલે કહ્યું કે, હું વધારે અંતરનો સફર કરી ચૂંટણી પ્રચાર કરી રહ્યો છું, પરંતુ મને નાનું હેલિકૉપ્ટર મળ્યું છે, પરંતુ હું મારી બહેનને પ્રેમ કરુ છું. જો કે, આ દરમિયાન પ્રિયંકાએ પણ ભાઈ સાથે મજાક કર્યો. બાદમાં બંન્ને પોત-પોતાની ચૂંટણી રેલી માટે રવાના થઈ ગયા.
