આજે ચોથા તબક્કામાં 9 રાજ્યોની 71 લોકસભા સીટ માટે મતદાન શરૂ થઈ ગયું છે. જે રાજ્યોમાં મતદાન થવાનું છે તેમાં બિહારની 5 , ઝારખંડની 3, મઘ્યપ્રદેશની 6, મહારાષ્ટ્રની 17, ઓડિશાની 6, ઉત્તર પ્રદેશની 13, રાજસ્થાનની 13 અને પશ્ચિમ બંગાળની 8 સીટો માટે મતદાન શરૂ થઇ રહ્યું છે. આ તબક્કામાં 12 કરોડ 79 લાખ મતદારો છે અને 943 ઉમેદવારો મેદાનમાં છે.
મધ્યપ્રદેશના મુખ્યમંત્રી કમલનાથે છિંદવાડામાં શિકારપુરમાં મતદાન કર્યું. સીપીઆઈના ઉમેદવાર કન્હૈયાએ બેગૂસરાયમાં મતદાન કર્યું. તો ઉદ્યોગપતિ અનિલ અંબાણીએ મુંબઈમાં કપ પરેડ વિસ્તારમાં મતદાન કર્યું. ફિલ્મ અભિનેત્રી રેખાએ મુંબઈના બાંદ્રામાં મતદાન કર્યું. ભાજપના લોકસભાના સાંસદ પરેશ રાવલે પત્ની સ્વરુપ સંપત સાથે વિલે પાર્લેમાં મતદાન કર્યું. ઉત્તરપ્રદેશના ગોરખપુરથી ભાજપના ઉમેદવાર રવિ કિશને મુંબઈના ગોરેગાંવમાં મતદાન કર્યું છે.
લોકસભા ચૂંટણી 2019ના ચોથા ચરણ માટે આજે દેશની 72 સીટો પર મતદાન ચાલુ છે. પશ્ચિમ બંગાળની 8 સીટો પર પણ સવારે જ મતદાન શરૂ થયુ છે. અહીં એક વાર ફરી મતદાન દરમિયાન હિંસાની ઘટના સામે આવી છે. આસનસોલમાં ટીએમસી અને ભાજપ સમર્થક આમને-સામને આવી ગયા હતા, જ્યાર બાદ પોલસે લાઠીચાર્જ કરવો પડ્યો. અહીં પોલિંગ બુથમાં ભાજપ નેતા બાબુલ સુપ્રીયો પણ કેટલાક લોકો સાથે ભીડાતા જોવા મળ્યા.
ઉત્તર પ્રદેશના મથુરાથી ભાજપના સાંસદ હેમા માલિનીએ મુંબઈમાં પોતાની દીકરીઓ સાથે જઈને મતદાન કર્યું. હેમાએ કહ્યું કે કોંગ્રેસે દેશના વિકાસ માટે કંઈ ખાસ નથી કર્યું. તેઓએ કહ્યું કે સની દેઓલે ગુરદાસપુરથી ચૂંટણી લડીને સારો નિર્ણય કર્યો છે. હેમાએ ગઈ વખતે પણ મથુરાથી ચૂંટણી જીતી હતી.
બૉલીવુડ સુપર સ્ટાર અમિતાભ બચ્ચન સમગ્ર પરિવારની સાથે મુંબઈમાં મતદાન કરવા પહોંચ્યા. અમિતાભની સાથે પત્ની જયા બચ્ચન, દીકરો અભિષેક અને વહુ એશ્વર્યા બચ્ચન પણ હાજર હતી. અમિતાભ સ્વચ્છતા અભિયાનથી લઈ કેન્દ્ર સરકારની ઘણી યોજનાઓના બ્રાન્ડ એમ્બેસેડર રહ્યા છે અને દેશના તમામ મુદ્દાઓ પર પોતાનો અભિપ્રાય આપે છે.
અભિનેતા સંજય દત્તે પણ પત્ની માન્યતાની સાથે મુંબઈમાં મતદાન કર્યું. તેઓએ કહ્યું કે, તે આ ચૂંટણીમાં પોતાની બહેનની સાથે છે અને તેમના માટે આ ઉપરાંત કોઈ મુદ્દો નથી. સંજય દત્તે વિશ્વાસ વ્યક્ત કર્યો કે તેમની બહેન પ્રિયા દત્ત ચૂંટણી જીતશે. કોંગ્રેસે પૂનમ મહાજનની સામે આ વખતે મુંબઈ ઉત્તર મધ્ય લોકસભા સીટ પરથી પ્રિયા દત્તાને ટિકિટ આપી છે. હાલના સાંસદ પૂનમ મહાજન ભાજપના દિગ્ગજ નેતા પ્રમોદ મહાજનની દીકરી છે.
2 વાગ્યા સુધીનું મતદાન
ઝારખંડ 44.90%
રાજસ્થાન 44.58%
બિહાર 37.71%
કાશ્મીર 6.66%
મધ્ય પ્રદેશ 44.28%
ઓડિશા 35.79%
મહારાષ્ટ્ર 31.04%
વેસ્ટ બંગાળ 52.37%
ઉત્તર પ્રદેશ 34.45%
